'Dhuein ka dosh Nahi Hai'
Dhuein ka Dosh Nahi Hai by Vikram Grewal 'Haraf' Dilli dilwaalon ki toh kab se thi Par fefdon ki baat alag hai Laal kile par dhool toh thi Ab kaali ret ki baat alag hai Dhuein ka dosh nahi hai. Raj dhaani mein raj toh tha Par jalti dhaan ki baat alag hai Rumaal meri jeb mein toh tha Ab chehre par hai toh baat alag hai Par dhuein ka dosh nahi hai. Pehle ped kaat ke aari ghis di Phir gaadi ki chaabi ghis di Jamna mein har bimaari seench di Sadken baari baari kheench di. Dhuein ka dosh nahi hai. Jahaan baadal paar chadhti lift ki tarakki Bandh daftar ke behosh wahi hain. Neechi sadkon par rengte nange badan Ke saath aur sarfarosh kai hain Dhuein ka dosh nahi hai. Ye dhuan nahi O Haraf! Uthhan ka josh yahi hai. Toh bebaak phoonk le punji apni Koi afsos nahi hai Dhuein ka dosh nahi hai. Dhuein ka dosh nahi hai.